Friday, June 24, 2011

29. බිඳුණු පෙම | Geek Love


දිනක උයනෙක හුදෙකලාවක...
බි‍ඳෙන තුරුගොමු සිලි සිලිය මැද...
සිත් පිරූ එක් සොඳුරු...රහසක්...
කොඳුරමින්...

ඇරඹි මා සොඳුරුතම සිහිනේ...
දඟකාර තෙලිතුඩින් ඔබගේ...
නේක පැහැයෙන්…පාට තවරා...
හිමි හිමින්...

ආදරේ මිහිරිතම පාඩම...
කියා දී ඉඩ ලද ඇසිල්ලක...
රිදුනු දෙතොලින්…නුරා කෙඳිරිලි...
සුසුමකින්...

කඳුළු එනතුරු සිනාසුණු අපි...
කඳුළු ඉතිරිව සිනා වියැකුණු...
ගෙවුනු විඳවපු…දවස් එළඹුණු...
අරුමෙකින්...

හඬා නොහඬා හවස් වරුවක...
හිර කරපු නුඹෙ කඳුළු අතරට...
මුදා හල මා හිතේ… වේගය...
වියරුවෙන්...

දරාගත හැකි නොහැකි ගානට...
නැගුණු විෂක‍ටු වචන වෙනුවට…
පහර දී බිත්තියට ඔබ අතරැඳි...
අයි පෑඩයෙන්....

පිය නඟද්දී යළි නො එන්නට....
ඇහුණාද මා හඩා වැ‍ටුණා...
ලෝකයම මට අහිමි වුණ සේ...
ශෝකයෙන්...

මා පණත් සරි.... එයත් මට සරි....
අහිමිකල මට මළත් කම් නැති...
බිඳුණු 3G අයි පෑඩ් එක...
තදකරන්...

මා ඇගේ හිත බිඳිද්දී ඈ බින්දේ මගේ අයිපෑඩයයි... වැඩියෙන් හැඬුවේ කවුරුදැයි ඔබ දන්නවාද......?

Tuesday, June 21, 2011

28. මගේ පුංචි කෙටි කතාව සහ තවත් කතා | My very first story



මෙම බ්ලොග් අඩවියේ ආරම්භයේම වරක් මා සඳහන් කර ඇති පරිදි මගේ කුළුඳුල් කෙටි කතාව පළවුණේ ටැබූ සබ්ජෙක්ට්ස් බ්ලොග් අඩවියේයි... නමුත් එම බ්ලොග් අඩවිය අවාසනාවන්ත ලෙස බිඳවැටීමත් සමඟම අතුරුදන් වූයේ එහි තිබූ හරවත් සංවාද, ගහමරා ගැනීම්, මඩ ප්‍රහාර පමණක් නෙවෙයි සියල්ල අතරේ තිබූ  මාගේ අහිංසක කෙටි කතාවත් සමඟම අතුරුදහන් වූවා... මා විසින් එහි පිටපතක් පරිඝනකයේ සුරැකිව තබාගන්නට ඇතැයි යන විශ්වාසයෙන් සොයා බැලූවත් අවාසනාවකට එවැන්නක් සොයා ගැනීමට හැකියාවක් ලැබුණේ නැහැ...

තමන් සතු වටිනා දෙයක් නැතිවූ පසු පොලිසියට යනවා වෙනුවට බජාර් එකේ අයියා හමුවීමට යාම වඩා ඵලදායී බව ප්‍රසිද්ධ රහසක්... උපදෙස පිළිපදිමින් මාගේ නැතිවුනු කෙටිකතාව සොයා ගැනීම සඳහා සිංහල බ්ලොග් අවකාශය නැමති බජාර් එකේ අයියා කෙනෙකු හමුවීමට මා තීරණය කලා...මෙහිදී මා සිතට නිතැතින්ම නැගුණේ 'මෝදර බස්පියා' ලෙස විරුදාවලිය ලත් වැපිනි සාන්ත මහතාවයි... තරමක දෙගිඩියාවෙන් කල් මැරූ මම අවසානයේ තීරණයකට එළඹ ඔහු හමුවීම සඳහා පිටත් වුණා...

පාඨකයන් බොහෝ දෙනෙකු බලාපොරොත්තු වන පරිදි මා ඔහු සොයා ගත්තේ රාත්‍රී සමාජ ශාලාවක, තැබෑරුමක හෝ බූරුපොළක සිටියදී නම් නෙවෙයි... මාහට ඔහු මුණගැසුනේ සිංහල බ්ලොග් අවකාශයේ සංගීත ලෝලී රසික රසිකාවියන්ගේ රසඟ්හතාවය ඔප දමනු වස්, නොමිලේ පවත්වාගෙන යනු ලබන සේවාවක් වන ගූග්ල් බස් රේඩියෝ නැමැති සමාජ සත්කාරක කර්තව්‍යයට උර දෙමින් සිටියදීයි...

පුද්ගලික කටයුත්තක් යෙදී ඇති හෙයින් ටික වේලාවකට අසන්නන්ගේ ගීත ඉල්ලීම් වලට ප්‍රතිචාර දැක්වීමට නොහැකි වීම ගැන වනවිටත් රේඩියෝව අසමින් සිටි සියලුදෙනාගෙන්ම කිහිප වරක්ම  සමාව ඇයදීමෙන් අනතුරුව ඔහු මා හා දොඩමලු වුණා... වචනයේ පරිසමාප්ත අර්ථයෙන්ම යහපත් මිනිසෙකු බව මට පසක් කල මොහුගේ මේ හැසිරීම, ඔහු ගැන වටින් පිටින් මා අසා ඇති කරුණු පිළිබඳව දෙවරක් සිතන්නට මට බල කලා... නිසාම අසන්නට කාරණය පසෙක තබා මා ඔහුගෙන් විමසුවේ ඔහුට එල්ල වී ඇති හැකින් චෝදනාමුදල් අපචාර චෝදනා වැනි දේ  පිළිබඳවයි...
සම්බන්ධයෙන් ඔහු දැක්වූයේ මෙවැනි අදහසක්...



"ඕවා ඔහොම තමයි මල්ලි, මට කියන්න තියෙන්නේ මෙච්චරයි... මුං වපුරපු අය මුං අරගෙන යාවි, තල වපුරපු  අය තල අරගෙන යාවි... කෝකටත් ඔයා ඔය දෙවල් ගැන වැඩිය හොයන්න යන්නේ නැතුව පාඩුවේ බ්ලොගිය කරගෙන ඉන්න.... දැන් මොකද්ද බොස්ට මගෙන් කෙරෙන්න ඕනේ..?"


ඒ පිළිබඳව දිගින් දිගටම හාරා අවුස්සනවාට ඔහු අකමැත්තක් දක්වන බව පසක් වූ හෙයින් මා පැමිණි කාරණය ඔහුට හෙලි කලා...ගතවූයේ විනාඩි කිහිපයක් පමණයි, ඔහුගේ උපදෙස් පැළිපැදීමෙන් පසු, මා හට අහිමි වූ කෙටි කතාව එකදු අකුරක් වත් අඩු නොවී මා අතට පත් වූයේ  මා විශ්මයට පත්කරමින්,,,,



"සේරම තියෙනවද බලන්න..." 


සිනාමුසු මුහුණින් ඔහු එසේ පවසද්දී සියල්ල නො අඩුව ඇතිබව සපථ කරමින් මා සොඳුරු මිනිසාට සමු දුන්නේ සැනසුම් සුසුම් හෙලමින්...


එසේ අපසුවෙන් සොයාගත් කතාව මාගේ බ්ලොග් අඩවියේ දැන් පලකර තිබෙනවා...... මඟහැරුණු කෙනෙකුට එය මෙතැනින් රසවිඳිය හැකියි...

ඉතින් මේ දීර්ඝ ආරම්භය වෙනත් කරුණක් සඳහන් කිරීමටයි... පසුගිය දිනෙක මහගෙදර ගිය අවස්ථාවක පරණ ලියකියවලි පිරවූ පෙට්ටගමක් පිරිසිදු කරමින් සිටි ආදරණීය මෑණියන් මා අතට පත් කලේ අපූරු දෙයක්... ඒ එම ලියකියවිලි අතර තිබූ  ඇය විසින් සු‍රැකිව තබාගත් ඇක්සයිස් පොතකින් ඉරාගත් පි‍ටුවක්... එහි සටහන්ව තිබුණේ  මීට වසර ගණනකට පෙර පාසල් යන වියේදී මා විසින් ලියා ඇති පුංචි කතාවක් ... මා මෙතෙක් සිතා සිටි අයුරු නිවැරදි නොවන බවත්, මාගේ පළමු කතාව මෙය විය හැකි බවටත් පැහැදිලි වූ හෙයින් දෙවරක් නොසිතාම එම කතාවත් මාගේ බ්ලොග් අඩවියේ පළකරන්නට මා තීරණය කලා...ඉතින් මේ සුළු සංස්කරණයකින් යුක්ත වූ එකල කුඩා දරුවෙකු වූ බීටල් පැංචා වන මා විසින් ලියන්නට යෙදුණු ඕරිමජිනල් කුළුඳුල් කෙටිකතාවයි...


-          මාදව කඩේ ගිය හැටි -

මාදව කීකරු දරුවෙක්...එයාගේ ගෙදර තිබුණේ දෙකේ කණුව ගාවයි... මාදවගේ අම්මාත් තාත්තාත් වැඩට යන වෙලාවට එයාව බලාගත්තේ අත්තම්මායි...දවසක් අත්තම්මා මාධවට සල්ලි දීලා කඩෙන් සීනි දෙසිය පනහකුත් තේකොල සීයකුත් ගේන්න කිව්වා...

කඩේට යන පාරෙදි මාදවට තරිඳු හම්බවෙලා අක්කපාන කොල කඩන්න පංසලේ ගල් පොත්තට යන්න කතා කල නිසා කඩේ යන එක නවත්තලා මාදව තරිඳුගේ පස්සෙන් වැ‍ටුණා...අක්කපාන කොල කඩලා තරිඳුගේ ගෙදර ගිහින් ඒවා පොත් අස්සට දාලා එහෙම ඉවර වෙද්දි කරුවලත් වැටීගෙන එනවා...

එතකොටයි මාදවට කඩේ යන්න ඕනේ කියලා මතක් වුණේ...කරුවල වැ‍ටුණත් සීනි නැතුව ගෙදර ගියොත් රෑ වුන එකටයි බඩු ගෙනාවේ නැති එකටය් දෙකටම බැණුම් අහන්න වෙන නිසා මාදව කඩේට යන්න හිතුවා...

බඩු අරගෙන බය යන්නත් එක්ක හයියෙන් සිංදුවක් කියාගෙන මාදව රූං ගාලා ගෙදර දුවගෙන ආවා... ගේ ලඟදි එයාගේ සිංදුවයි දිවිල්ලයි නතර වුණේ කරුවලේ පාර අයිනේ කවුද බිම වාඩිවෙලා ඉන්නවා දැකපු නිසයි...

හෙමින් හෙමින් තව ටිකක් ඉස්සරහට ගිහින් මාදව හයියෙන් මෙහෙම ඇහුවා...

"කව්ද ඔතන....?"

සද්දයක් නෑ....

"කව්ද ඔතන...?"

මාදව ආයෙත් ඇහුවා... ඒත් සද්දයක් නෑ...

"කතා කලේ නැත්තම්... තේකොල මුලෙන් ගහනවා...!"

මෙහෙම කිව්වත් අමුත්තගෙන් කිසි සද්දයක් නැති නිසා බයවුණු මාදව තේකොල මුලෙන් දමලා ගැහුවා... අමුත්තා හෙලවුණේ වත් නැහැ...

"කවුද ඔතන...?"

මාදව ආයෙත් ඇහුවා...

"කව්ද ඔතන...??"

ඒත් උත්තරයක් නැහැ...

"කතාකලේ නැත්නම් සීනි මුලෙන් ගහනවා...!"

අමුත්තා කතාබහක් නැතුව එහෙමම ඉන්න නිසා හොඳටම බයවුණු මාදව සීනි මුලෙනුත් අමුත්තාට ගැහුවා... ඒත් අමුත්තා එහෙමමයි...


කරගන්න දෙයක් නැති තැන බයෙන් බයෙන් තව ටිකක් ඉස්සරහට ගිය මාදවට මෙහෙම කියවුණා...

"අඩ්ඩඩ්ඩා........ මේ දෙකේ කණුවනේ....!!!"

කතාව මෙතනින් ඉවරයි... කියවූ ඔබ සැමට ස්තූතියි… අකුරු රවුම් කර ලිව්වේ බීටල් පැංචා....


ප/ලි/ : 

මා කතාව ලිවීමට සෑහෙන කාලයකට පෙර ලියවෙන්නට ඇතැයි සැක කල හැකි කතන්දර තම කුඩා කාලයේ නිර්මාණය කල කවියක් මෙතැන පලවී තිබියදී ටික කලකට පෙර ආසාවෙන් කියවූවා මතකයි...

Thursday, June 16, 2011

27. පුංචි පහේ අභියෝගයක්... | Challenge your left brain


idea_bulb5
මම කලින් පල කල සම්මුඛපරීක්ෂණයක් ගැන කෙටියෙන් පෝස්ටය කියවන්න ලැබුණු හිතවතෙක් ඒකේ සඳහන් වෙලා තිබුණු ගැටළු කිහිපයක් ගැන අහලා එවලා නම් දැන් සෑහෙන දවසක්... පිළිතුරක් යවාගැනීමට නොහැකි වුණ අඩුව මකන්නත් එක්කම ඒ ගැටළු වලට තවත් කිහිපයක් එකතු කරලා හැමදෙනාටම කියවන්න පුළුවන් විදියට පෝස්ට් එකක් විදියටම පල කරන්නට හිතක් පහල වුණා...
මෙවැනි රසවත් ගැටළු දු‍ටු විගස මගේ දිනපොතේ කුරු‍ටු ගා ගැනීමේ කාලයක සිට ප්‍රගුණ කර ඇති හොඳ පුරුද්දට පින් සිදුවෙන්නට පල කලයුතු දේ සොයාගැනීම නම් එතරම් අමාරු කාරියක් වුනේ නැහැ... අවශ්‍යවූයේ පුංචි පහේ පරිවර්තන කර්ථව්‍යයකට මිඩංගු කිරීමට ඉස්පාසුවක් සොයා ගැනීම විතරයි...
පෝස්ට් එක කෙටි කරන්න අවශ්‍යය නිසා කතාව අඩු කරලා ප්‍රශ්ණ ටික කෙළින්ම දාන්නම්...මේ කිසිවක් මා විසින් නිර්මාණය කළ ඒවා නම් නෙවෙයි... එහෙන් මෙහෙන් ඇස ගැ‍ටුණු විටෙක අමතක වෙනවාට අකමැති නිසා විටින් විට සටහන් තබාගත් ඒවායි...ඔබ දන්නා, නොදන්නා, අනුමාන කරන, නිර්මාණය කරන ඕනෑම පිළිතුරක් වෙලාව ඇති විදියට සටහන් කරන්න අමතක කරන්නෙපා...
කාලෙකින් තේරවිලි ‍තෝරලා නැත්නම්, වම් පැත්තේ මොලේ මලකඩ කඩලා ටියුන් කරලා ගන්න අවශ්‍යය නිසා සරල ගැටළු කීපයක් අඩංගු වෝම් අප් වටයකුත් අන්තර්ගතයි...
===================================
වෝම් අප් වටය
===================================
(a.) එවරස්ට් කන්ද සොයා ගැනීමට ප්‍රථම, ලෝකයේ උසම කන්ද වූයේ කුමක්ද..? SOLVED by අනුරාධ
(b.) විවාහක යුවලකට දරුවන් දෙදෙනෙකු සිටිනවා යැයි සිතමු... මින් එක දරුවෙකු ගැහැණු දැරිවියක නම් අනෙක් දරුවා පිරිමි දරුවෙකු වීමේ සම්භාවිතාව කොපමණද..? (ඉඟිය : 50% හෝ 1/2 නොවේ.) SOLVED by මදුශාන්
(c.) කූඩයක ඇත්තේ ඇපල් ගෙඩි පහක්... මිනිසුන් පස් දෙනෙකු විසින් එක් අයෙක් එක ඇපල් ගෙඩිය බැගින් ගත්තා නම් කූඩයේ එක් ඇපල් ගෙඩියක් ඉතිරි විය හැක්කේ කෙසේද..? SOLVED by අනුරාධ
(d.) නගරයේ ඇති උසින් අඩු ගුවන් පාලමක් යටින් වැටී ඇති මාර්ගයේ හිස් බැරල් පැටවූ ලොරියක් පදවාගෙන එන ඔබ දකින්නේ ලොරි රථයට පාලම යටින් ගමන් කිරීමට නොහැකි ලෙස රථයේ වහලය අඟලක් වැනි සුළු ප්‍රමාණයකින් උසින් වැඩි බවයි...ගමනාන්තයට ලඟා වීමට මෙම මාර්ගය හැර වෙනත් මාර්ගයක් නැතිනම් ඔබගේ තීරණය කුමක්ද..? SOLVED by අනුරාධ
(e.) ඔබ සිටින්නේ කිසිඳු ලෝහමය වස්තුවක් නොමැති අගුලු දැමූ කාමරයකැයි උපකල්පනය කරන්න... ඔබ සතුව ඇත්තේ පෙනුමෙන්, බරින්, ශබ්ධයෙන් සහ ගන්ධයෙන් සම්පූර්ණයෙන්ම එක සමාන වූ නැවිය නොහැකි කාන්දම් දණ්ඩක් සහ යකඩ දණ්ඩක්... කාන්දම සහ යකඩය එකිනෙකින් වෙන්ව හඳුනා ගැනීමට ඔබ යෝජනා කරන ක්‍රමය කුමක්ද? SOLVED by hare :-)
(f.) "මම රුපියල් දාහක් ඔට්‍ටු දාන්න ලෑස්තියි, ඔබ මට රුපියල් දෙදාහක් දුන්නොත් මම තුන්දාහක් දෙන බවට..." යැයි අයෙකු ඔබට පැවසුවහොත් ඔබ එම ඔට්‍ටුව බාරගන්නට ඉදිරිපත් වෙනවාද..? පිළිතුර පැහැදිලි කරන්න... SOLVED by සහෝධරයා
===================================
ගැටළු අංක : (1) SOLVED by bbpncb
===================================
මේක නම් අතිශයින්ම ජනප්‍රියයි...නිර්මාණශීලී බව නිසාම මඟහරින්න අකමැති නිසා සටහන් කරන්නම්...
රාත්‍රී මැදියම් යාමයේ ඇදැලෙන අනෝරා වැස්සක් මැදින් රිය පදවාගෙන යන ඔබ දකින්නේ පසෙකින් ඇති බස් නැවතුමේ බස් රථයක් එන තුරු ‍රැඳී සිටින මගීන් තිදෙනෙක්…එහි සිටින්නේ පහත සඳහන් වෙන පුද්ගලයින්;
1. අතිශයින්ම මහළු රෝගී කාන්තාවක්...පවතින ශීතල කාලගුණය තුළ අධික අසනීප තත්වය නිසා ඇය බස් රථයක් පැමිණෙනතුරු වත් ජීවත් වේවිදැයි යන්න සැක සහිතයි...
2. දෙවෙනියට සිටින්නේ ඔබගේ ප්‍රාණසම මිතුරන් කිහිප දෙනාගෙන් කෙනෙක්...ඔහු වරක් තම දිවි පරදුවට තබා ඔබගේ ජීවිතය බේරාගැනීමට පවා ඉදිරිපත්වී ඇති අතිශය හිතවතෙක්...
3.තුන්වැන්නිය ඔබගේ සිහින කුමාරියයි...ඇය හමුවී වචන කිහිපයක් හෝ කතාකිරීමට අවස්ථාවක් ලැබෙන තුරු ඔබ සිටින්නේ ඇඟිලි ගනිමින්...
ගැටළුව මෙයයි...ඔබගේ වාහනයේ ‍රැගෙන යා හැක්කේ එක් අයෙක් පමණක් නම්, ඔබගේ තීරණය කුමක් වේද..?
===================================
ගැටළු අංක : (2) SOLVED by bbpncb
===================================
ඝන වනාන්තරයක ගමන් කරන ඔබට මුණ ගැසෙන්නේ කැළයේ සිටින යෝගීන් දෙදෙනෙක්...මොවුන් දෙදෙනා සතුව ඇත්තේ අපූරු පුරුද්දක්...එනම් මින් පලමු යෝගියා සඳුදා අඟහරුවාදා සහ බදාදා දිනවල බොරු කියන්නෙක්...දෙවැනි යෝගියා බ්‍රහස්පතින්දා සිකුරාදා සහ සෙනසුරාදා යන දිනවල බොරු කියන්නෙක්...
ඔබට අවශ්‍යය වන්නේ අද දවස සතියේ කිනම් දවසදැයි දැන ගැනීමටයි...මෙම ගැටළුව යොමු කල විට යෝගීන්ගේ පිළිතුරු පහත පරිදියි...
1 යෝගියා : "ඊයේ මම බොරු කියන දවසක්"
2.යෝගියා : "ඊයේ මමත් බොරු කියන දවසක්"
මෙම ගැටළුවට අනුකූලව අද දවස කවදාදැයි සොයන්න...
===================================
ගැටළු අංක : (3) SOLVED by bbpncb
===================================
ආයතනයක ප්‍රධානියෙකු තම ආසනයෙන් මඳක් බැහැරට යන්නේ රුපියල් දෙදාහක නෝට්‍ටුවක් තම කාර්යාලීය මේසය මත අතපසු කරමින්... සුළු වේලාවකින් පෙරලා පැමිණෙන ඔහු දකින්නේ මුදල් නෝට්‍ටුව කිසිවෙකු විසින් සොරාගෙන ඇති බවයි...කාමරයට ඇතුලුවිය හැකි සේවකයන් ඇත්තේ දෙදෙනෙකු පමණක් බැවින් ඔවුන්ගෙන් ප්‍රශ්න කිරිමේදී ඔවුන් දෙන්නේ මෙවැනි පිළිතුරුයි...
පලමු සේවකයා පවසන්නේ ඔහු එම නෝට්‍ටුව දු‍ටු බවත්, එය සුළගේ ගසාගෙන යාවියැයි බියෙන් දුරකථන නාමාවලියේ පළමු පි‍ටු දෙක අතර ‍රැඳවූ බවයි...දෙවෙනි සේවකයා පවසන්නේ දුරකථන නාමාවලියේ එසේ රඳවා තිබූ නෝට්‍ටුව ඔහු දු‍ටු බවත්, එය පළමු පි‍ටු දෙක අතර ඇති විට කිසිවෙකුට පහසුවෙන් දැකගත හැකි නිසා තමා එය එතැනින් ඉවත් කර පොතේ ඇතුළු පි‍ටු වන 45 වෙනි සහ 46 වෙනි පි‍ටු අතර සඟවා පි‍ටු අංක හොඳින් මතක තබාගත් බවයි...
වහ වහා දුරකතන නාමාවලිය පෙරලා බලන ප්‍රධානියා දැන ගන්නේ එහි මුදල්නෝට්‍ටුවක් නොමැති බවයි...කෙසේවෙතත් ඔහු සිද්ධිය පිළිබඳව පොලිසියට දැනුම් දෙන්නේ, එය පැහැරගත් සොරා ලෙස දෙවෙනි සේවකයාත් ඉදිරිපත් කරමින්...ආයතන ප්‍රධානියා සොරාව නිවැරදිව හඳුනාගත්තේ කෙසේද..?
===================================
ගැටළු අංක : (4) SOLVED by bbpncb
===================================
උතුරු දිශාවේ සිට දකුණු දිශාවට විහිදුනු මාර්ගයක් අසල ඇති එළිමහන් මුර පොළක රාජකාරියේ යොදවා ඇති හමුදා සෙබලුන් දෙදෙනෙක්... එකිනෙකා ස්පර්ෂ නොවෙන ලෙස මොවුන් සිටගෙන සිටින්නේ එක් අයෙකු එක එල්ලේ මාර්ගයේ උතුරු දිශාව දෙස නෙත් යොමාගෙන සිටින අතරේ අනෙකා මාර්ගයේ ඊට විරුද්ධ පැත්ත වන දකුණු දිශාව දෙස නෙත් යොමාගෙන සිටින ලෙසයි...
හදිසියේම එක් භටයෙකු අනෙකා ගෙන් විමසන්නේ ඔහු සිනාසෙන්නේ මන්ද කියායි...සිනාසුණු භටයා හඬ නඟා සිනාසුනේ නැතිනම් ඒ බව අනෙකා දැන ගත්තේ කෙසේද..?
===================================
ගැටළු අංක : (5) SOLVED by මදුශාන්
===================================
ඔබගේ එකම දරුවා තවත් ළමුන් පිරිසක් සමඟ ඔබ නිවසට තරමක් ආසන්නයේ ඇති දුම්රිය මාර්ගයේ ක්‍රීඩා කරමින් සිටිනා අයුරු දකින ඔබ එය අන්තරාදායක බැවින් ඔවුන් එතැනින් ඉවත් කරගැනීම සඳහා ඒ දෙසට පියමනිනු ලබනවා... මංතීරු දෙකකින් යුතු මෙම දුම්රිය මාර්ගයේ එක් මංතීරුවක් කලක පටන් පාවිච්චියට නොගෙන අත හැර දමා ඇති අතර අනෙක් මං තීරුව දිනපතා පාවිච්චි කරන්නක්... ළමුන් අතරින් එක් අයෙකු ක්‍රීඩා කරන්නේ අතහැර දමා ඇති මංතීරුවේයි...පාවිච්චියට ගන්නා මංතීරුවේ ඔබගේ දරුවාද ඇතුළුව ළමුන් හතර දෙනෙකු ක්‍රීඩා කරමින් සිටිනවා...
ඒ දෙසට පියනඟන ඔබ දුම්රිය පීළි මාරු කරන ලීවරය අසලදී දකින්නේ ළමුන් දෙසට ධාවනය වන දුම්රියක්... ඔබ තවමත් ළමුන් වෙත ළඟාවී නැති නිසා ඔවුන්ව කෑගසා ඉවත් කරගැනීමට තරම් ප්‍රමාණවත් කාලයක් නැහැ... කළ හැකි එකම දෙය වන්නේ ලීවරය යොදාගෙන දුම්රියේ ගමන්මඟ පාලනය කිරීම පමණයි...
ඔබ කිසිත් නොකර දුම්රියට යන්නට ඉඩ දුනහොත් ඔබ දරුවාද ඇතුළුව බොහෝදුරට ළමුන් හතර දෙනෙකු ජීවිතක්ෂයට පත්වෙනවා...දුම්රිය අනෙක් මංතීරුවට මාරු කළහොත් ඒ ළමුන් හතර දෙනා බේරාගත හැකි නමුත් අනෙක් ළමයා ජීවිතක්ෂයට පත්වෙනවා...
ඔබගේ තීරණය කුමක්ද..? දුම්රිය එලෙසම ධාවනය වන්නට ඉඩ හරිනවාද? අනෙක් මංතීරුවට මාරු කරනවාද..? පිළිතුරට හේතු පහදන්න...
===================================
ගැටළු අංක : (6) - SOLVED by Anonymous
===================================
ඔබ සිටින්නේ රූපවාහිනී රියැලටි ටීවී අත්දැකීමකයැයි සිතමු...තරඟය ඉතා සරලයි...ඔබ ඉදිරියෙන් ඇත්තේ කවුළු තුනක්...මින් එක් කවුළුවකින් එහා පැත්තේ ඇත්තේ වටිනා මෝටර් රථයක්...අනෙක් කවුළු දෙකෙහි කිසිත් නැහැ...ඔබ කළ යුත්තේ මෝටර් රථය ඇතැයි උපකල්පනය කරන කවුළුව ‍තෝරාගැනීමයි... නමුත් ඔබට ලැබෙන්නේ එක අවස්ථාවක් පමණයි...
ඔබ කවුළු අංක එක ‍තෝරාගත්තා යැයි උපකල්පනය කරමු... තරඟය මෙහෙයවන නිවේදකයා කරන්නේ එය විවෘත කරනවා වෙනුවට කවුළු අංක තුන විවෘත කර පෙන්වීමයි...ඔබගේ වාසනාවට එය හිස් කවුළුවක්...දැන් ඉතිරි කවුළු දෙකින් එකක මෝටර් රථය ඇති බව පැහැදිලියි...මෙහිදී නිවේදකයා ඔබට ලබා දෙන්නේ අපූරු අවස්ථාවක්... එනම් ඔබට අවශ්‍යය නම් ඔබගේ තේරීම වෙනස් කළ හැකියි...
ඉතින් ඔබ කවුළු අංක දෙකට මාරු වෙනවාද... නැතිනම් පළමු තීරණයේම සිටිනවාද...? ඔබගේ තීරණයට හේතුව පැහැදිලි කරන්න...
===================================
ගැටළු අංක : (7) SOLVED by මුහුදු කොල්ලකාරයා
===================================
නිවසක උඩුමහලේ ඇති බල්බ තුනක ස්විචයන් තුන ඇත්තේ පහත මාලයේයි... ස්විචයන් ඇති ස්ථානයේ සිට බල්බ දැක ගැනීමට නොහැකියි... ඔබ කළ යුත්තේ කිනම් ස්විචය කිනම් බල්බයට දැයි හඳුනා ගැනීමයි...කෙසේ වුවත් අභියෝගය නම් ඔබට ඉහත මාලයට ගමන් කිරීමට අවස්ථාව ලැබෙනුයේ එක වාරයක් පමණයි.... මේ සඳහා ඔබ යෝජනා කරන උපක්‍රමය කුමක්ද...
===================================
ගැටළු අංක : (8) SOLVED by මුහුදු කොල්ලකාරයා
===================================
මේ නිවසේම තවත් එක් කාමරයක ඇති විදුලි බල්බයක ස්විචය ඇත්තේ තවත් එවැනි ස්විච් තුනක් ඇති ස්විච් පුවරුවකයි... අභියෝගය වන්නේ ස්විචයන් හතරෙන් බ්ල්බ්ය ක්‍රියාත්මක වීම සඳහා නිවැරදි ස්විචය කුමක්දැයි සොයා ගැනීමයි... පෙර මෙන්ම අවස්ථාව ඇත්තේ එක වරක් පමණක් ඉහල මාලයට ගමන් කිරීමට නම්, නිවැරදි ස්විචය සෙවීමට ඔබ යෝජනා කරන උපක්‍රමය කුමක්ද..?
(UPDATE : මෙම ස්විච් සියල්ලේම බල්බ් ඇත්තේ උඩු මහලේ, පහත මාලයට නොපෙනෙන ලෙසයි…)
===================================
ගැටළු අංක : (9) SOLVED by pathumhdeS
===================================
අතිශයින්ම දක්ෂ තර්කකරුවන් තිදෙනෙකුට අවශ්‍යය වන්නේ ඔවුන් අතරින් වඩාත්ම දක්ශයා ‍තෝරාගැනීමටයි... මේ සඳහා ඔවුන්ගේ ගුරුවරයා වෙත යන ඔවුන් විසඳීමට අපහසු ගැටළුවක් ලබාදෙන ලෙස ඉල්ලා සිටිනවා...ගුරුවරයා සිදුකරන්නේ අපූරු ක්‍රියාකාරකමක්... ඔවුන් තිදෙනාගේම දෑස් හොඳින් ආවරණයක කරන ගුරුවරයා සෑම පුද්ගලයාගේම නලලේ සුදු හෝ කලු හෝ කතිරයක් සළකුණු කරනු ලබනවා...
ඔවුන්ට ලැබෙන නියෝගය වන්නේ තමන්ගේ දෑස ආවරනය ඉවත් කල විට අනෙක් දෙදෙනාගේ නලලේ ඇති සලකුණු වලින් එකක් හෝ සුදු පැහැයෙන් යුක්ත නම් තමන් අත එසවිය යුතු බවයි...
මෙම අත එසැවීම උපකාරය කරගෙන තර්කකරුවන්  තමන්ගේ නළලෙහි ඇති කතිරයේ පාට තීරණය කළ යුතුයි...අඩුම කාලයකින් නිවැරදි පිළිතුරු දෙන්නා වඩාත් දක්ෂයා ලෙස පිළිගැනෙනවා...
ඔවුන්ගේ එකඟතාවය මත පරීක්ෂණය ආරම්භ වෙනවා...දෑස් ආවරනය ඉවත් කිරීමෙන් පසු තිදෙනාම අත් ඔසවන්නේ ඔවුන් තිදෙනාටම අනෙකුන් දෙදෙනාගෙන් එක් අයෙකුගේ හෝ සුදුපැහැති කතිරයක් දර්ශණය වන නිසාවෙන්...
නමුත් එකදු පුද්ගලයෙකුවත් පිළිතුරක් ප්‍රකාශ කරන්නේ නැහැ...අවසානයේ එක් අයෙකු මෙසේ පිළිතුරු දෙනවා, “මගේ නලලේ ඇත්තේ සුදු කතිරයක්...”
ඔහු නිවැරදිව එය හඳුනාගත්තේ කෙසේද..?
===================================
ගැටළු අංක : (10) SOLVED by pathumhdeS
===================================
මෙම ගැටළුවේ තවත් කොටසක් තිබෙනවා... තරඟය අවසානයේ පැරදුනු දෙදෙනා චෝදනා කරන්නේ තමන්ට අසාධාරණයක් සිදුවූ බවයි... එයින් පසු ඔවුන් හතරදෙනාම තීරණය කරනුයේ ඉහත තරඟය අමතක කර සැමදෙනාටම සාධාරණ අවස්තාවන් ලැබෙන ආකාරයේ තරඟයක් නැවත පැවැත්වීමටයි...
ගුරුවරයා මෙවර ඔවුන් වෙත දක්වන්නේ රතුපැහැයෙන් දෙකක්ද කොලපැහැයෙන් තුනක්ද වන සේ හිස්වැසුම් පහක්...ඉන්පසු කාමරයේ ආලෝකය නිවාදමන ඔහු ඉන් හිස්වැසුම් තුනක් ඔවුන් තිදෙනාට පළඳවනු ලබනවා...ඉතිරි හිස්වැසුම් දෙක කාටත් නොපෙනෙන ලෙස සඟවන ඔහු ආලෝකය නැවත ක්‍රියාත්මක කරනවා...තරඟයේ ඇත්තේ සුළු වෙනසක්, අනෙක් දෙදෙනාගේ හිස්වැසුම් වල ඇති පාට නිරීක්ෂණය කිරීමෙන් අනතුරුව තමාගේ හිසෙහි ඇති හිස්වැසුමෙහි පැහැය නිවැරදිව කියන තැනැත්තා ජයග්‍රාහකයායි...
මෙහිදී සිදුවන්නේ අපූරු දෙයක්...ගුරුවරයා නැවත ආලෝකය ක්‍රියාත්මක කිරීමටත් ප්‍රථමයෙන් අනෙක් දෙදෙනාගේ හිස්වැසුම් නිරීක්ෂණය නොකරම, කලින් තරඟයේ ජයග්‍රාහකයා නිවැරදිව තම හිස් වැසුමේ වර්ණය සඳහන් කරන්නේ සියළු දෙනා පුදුමයට පත් කරන අතරේම තමා වඩාත් දක්ෂයා බව සනාථ කරමින්...ඔහු තම හිස්වැසුමේ පැහැය නිවැරදිව තීරණය කළේ කෙසේදැයි ඔබට පැහැදිලි කල හැකිද..?
===================================
ගැටළු අංක : (11) SOLVED by කඩේ හාමිනේ
===================================
තට්‍ටුනිවාසයක දොළොස්වන මහලේ ඇති නිවසක ජීවත් වන මිනිසෙකුට ඇත්තේ පුදුමාකාර පුරුද්දක්... දිනපතා උදෑසන ‍රැකියාවට යද්දී දොලොස්වන මහලේ සිට බිම් මහලට විදුලි සෝපානයේ ගමන් කරන ඔහු, ‍රැකියාව අවසන්වී නිවසට පැමිණෙද්දී බිම් මහලේ සිට දොලොස් වන මහලට කෙලින්ම ගමන් කරනුයේ සෝපානයේ තවකෙකු ඇත්නම් හෝ එදින වැසි දිනයක් නම් පමණයි...
එසේ නැතිනම් දස වෙනි මහල දක්වා පමණක් විදුලි සෝපානයේ ගමන් කරන ඔහු ඉතිරි මහල් දෙක ගමන් කරන්නේ තරප්පු පෙල දිගේයි...
මොහුගේ මේ හැසිරීමට හේතුවක් ඔබට විස්තර කල හැකිද..?
===================================
ගැටළු අංක : (12) - SOLVED by Anonymous
===================================
එක්තරා සුරූපී තරුණියකට තම මවගේ අවමංගල්ය උත්සවය දිනයේදී එයට සහභාගී වීමට පැමිණි කඩවසම් තරුණයෙකු මුණගැසෙනවා...දු‍ටු සැනින් ඔහු පිළිබඳව සිතක් පහල කරගන්නා ඇය හට අවාසනාවකට ඔහු හා කතා කිරීමට හෝ දුරකථන අංකයක් ඉල්ලා ගැනීමට අවස්ථාවක් නොලැබෙන්නේ කාර්යබහුලත්වන නිසායි...කෙසේ වුවත් ඇය සිය හදවතින්ම ඔහු හා පෙමින් බැ‍ඳෙනවා...
මින් දින කිහිපයකට පසු ඇයගේ සොයුරිය ඝාතනයට ලක්කෙරෙන අතර, පොලිසියෙන් සොයා ගන්නේ මෙම ඝාතනය සිදුකර ඇත්තේ මෙම කාන්තාව විසින් බවයි....
ඇයට මෙසේ සිදු කිරීමට හේතුවක් ඔබට උපකල්පනය කල හැකිද..?
===================================
ගැටළු අංක : (14) SOLVED by Anonymous
===================================
නොදන්නා රටක සවාරියක් යන ඔබ එහිදී නොකල වරදකට සිරගත වෙනවා...මෙම රාජ්‍යය පාලනය කරනුයේ කෲර රජ කෙනෙක්... ඔබත් ඇතුළුව සිරකරුවෙන් විසිදෙනෙකුට ඔහු අමානුෂික ලෙස මරණ දණ්ඩනය නියම කරනු ලබනවා... නමුත් මරණ දණ්ඩනය ක්‍රියාත්මක වන දිනයට පෙරදිනයේ ඔබ සියළු දෙනා මුණගැසෙන ඔහු දිවි ගලවා ගැනීම සඳහා අපූරු අවස්ථාවක් ලබා දෙනවා... තර්කශාස්ත්‍රයේ කෙළ පැමිණියෙක් වූ ඔහුගේ පණිවුඩය මෙසේයි...
" මම උඹලාට නිදහස් වෙන්නට එක අවස්ථාවක් හෙට දිනයේ දෙන්න කැමතියි...හැබැයි මේක පුංචි සෙල්ලමක්...මෙහෙමයි වෙන්නේ...
අපි ඉස්සෙල්ලාම කරන්නේ උඹලා විසි දෙනාවම එක පේළියට හිටවන එකයි... ඊට පස්සේ අපි උඹලා හැම එකාගෙම ඔළුවට තොප්පිය බැගින් දමනවා...මේක රතු තොප්පියක් වෙන්නත් පුළුවන් නිල් තොප්පියක් වෙන්නත් පුළුවන්...හැබැයි එකෙකුටවත් තමන්ගේ තොප්පියේ පාට බලන්න තහනම්... උඹලට පේන්නේ තමන්ගේ ඉස්සරහා ඉන්න උන්ගේ තොප්පි වල පාට විතරයි...ආපහු හැරිලා බලන්න බැහැ...සිග්නල් දෙන්න කතා, කරන්න මොකුත් බැහැ...
හරියටම කිව්වොත් අන්තිම එකාට තොප්පි දහනවයක් පේනවා, ඊළඟ එකාට තොප්පි දහ අටක් පේනවා ඔන්න ඔය විදියයි....පළවෙනි එකාට එක තොප්පියක්වත් පේන්නේ නෑ…
අපි වැඩේ පටන්ගන්නේ පෝලිමේ අන්තිම එකාගෙන්... ඉස්සරහා ඉන්න උන්ගේ තොප්පි ටික බලලා ඌ කියන්න ඕනේ තමන්ගේ තොප්පියේ පාට... හරියට කිව්වොත් ඌ නිදහස්...නැත්තම් ෆ්ලැකෑන්ස්...
ඊළඟට එනවා දහ නව වෙනියට...ඌටත් ඒ විදියමයි... මේ විදියට අපි පළවෙනි එකා වෙනකල්ම එනවා... පැහැදිලියිනේ.... උඹලා අද රෑ එළි වෙනකල් හරි කල්පනා කරලා ගැලවෙන්න ක්‍රමයක් හදා ගනිල්ලා...
මතකනේ...නෝ කතා නෝ සිනා නෝ සිග්නල්...කියන්න පුළුවන් එකම දේ තමන්ගේ තොප්පියේ පාට විතරයි...ඒකත් අහනකල් ඉන්න ඕනේ... උඹලට අදහන දෙයියෙක්ගේ පිහිටයි.... බුහාහා හාහා....!!!!"
තමා පරිඝණක තාක්ෂණය, බ්ලොග් ලිවීම වැනි දේ ගැන හෙම දන්නා තරමක බුද්ධිමතෙක් බව ඔබ මීට පෙර අනෙක් සිරකරුවන්ට පාරම් බා ඇති නිසා ඔවුන් සියළුදෙනාම විසඳුමක් සෙවීම සඳහා ඒකමතිකව ගැටළුව භාර දෙන්නේ ඔබටයි...
නිදහස්වීම සඳහා ඔබගේ උපාය කුමක්ද...?
===================================
ගැටළු අංක : (15)
===================================
මේ ගැටළුව ඉතා මෑතකදී මම අහුලා ගත්තේ කතන්දරගේ කමෙන්‍ටුවකින්... ඉතින් මෙහි අයිතිය සම්පූර්ණයෙන්ම ඔහු සතුයි... නිවැරදි පිළිතුරේ වගකීමත් කතන්දරම දරාගනීවි යැයි සිතමු...
මේ කතන්දරගේ වචන;
“මෙන්න මගෙන් IQ ප්‍රශ්නයක්. හැබැයි තත්පර පහක් ඇතුලත මනෝමයෙන් (කොල, පන්සල්, කැල්කියුලේටර් භාවිතයෙන් තොරව) උත්තර දෙන්න ඕනෑ. බැයි නං IQ Test පරාදයි.

ළමුන් 30 දෙනෙකුගෙන් යුත් පන්තියක පහලොස් (15) දෙනෙක් ලඟ රතු පෑන් තිබේ. අල්ලපු පන්තියේ ළමෝ හතලිස් දෙදෙනෙක් (42) සිටිති. ඔවුන් ලඟ රතු පෑන් කීයක් තිබේද?”
===================================

මේතාක් ගැටළු ඔබ සාර්ථකව විසඳුවානම් මගේ හදපතුළෙන් නැ‍ඟෙන සුභ පැතුම් පිළිගන්න... ඔබට බුද්ධිමත් බවේ කිරුළු පළන්දන අවසන් ගැටළුව එසේනම් විසඳමු...

===================================
කිරුළු පළන්දන ගැටළුව
===================================
එක්තරා අධ්‍යාත්මික යෝගීවරු තිදෙනෙකු සිටිනවා... මින් එක් අයෙක් හැමවිටම ඇත්ත කියන අයෙක්, අනෙක් යෝගීවරයා හැමවිටම බොරු කියන අයෙක්...තුන්වෙනියා විටෙක ඇත්තද විටෙක බොරුද කියන අයෙක්...
ඔබට උපරිම වශයෙන් මොවුන් වෙත ඔව්  හෝ නෑ යන වචන දෙකින් පමණක් පිළිතුරු දියහැකි ගැටළු තුනක් යොමු කල හැකියි... ඔබගේ අභියෝගය වන්නේ ප්‍රශ්ණ තුන යොදාගෙන බොරු කියන යෝගියා කවුද, ඇත්ත කියන යෝගියා කව්ද, විටෙක බොරුද විටෙක ඇත්තද කියනා යෝගියා කව්දැයි හඳුනා ගැනීමයි...
ආහ්... කියන්නට අතපසු වූ තවත් යමක් නම්, මෙම යෝගීන් තිදෙනාටම හොඳින් සිංහල තේරුනත් සිංහලෙන් පිළිතුරු දීමට නොහැකියි...ඔවුන් පිළිතුරු දෙන්නේ ඔවුන්ගේ භාෂාවෙන්...නමුත් එක් වාසියකට ඇත්තේ ඔබ ඇසියයුතු ගැටළු වලට පිළිතුර ඔව් හෝ නෑ පමණක් වන නිසා ඔවුන් පිළිතුරු දෙන්නේ වචන දෙකකින් පමණයි...
ඉන් එක් වචනයක්  'ජිල්...' අනෙක් වචනය 'බුහ්...'
අවාසනාවකට අප මෙම භාෂාව නොදන්නා නිස 'ජිල්' යන්නෙහි තේරුමත්, 'බුහ්' යන්නෙහි තේරුමත් අපි දන්නේ නැහැ...  සමාන්‍යදැනීමෙන් අපට වටහා ගතහැකි දෙය නම්  'ජිල්' යන්නෙහි තේරුම 'ඔව්' නම් 'බුහ්' යන්නෙහි තේරුම අනිවාර්යෙන්ම  'නෑ' වියයුතුයි... ඒ ආකාරයෙන්ම 'බුහ්' යන්නෙහි තේරුම 'ඔව්' නම් 'ජිල්' යන්නෙහි තේරුම අනිවාර්යෙන්ම 'නෑ' වියයුතුයි...
යෝගීන් තිදෙනා හඳුනා ගැනීම ඔබට බාරයි...
(ඉඟිය : මෙය විහිළුවක් නොවේ... ඉහත දත්ත යොදාගෙන මෙය යෝගීන් තිදෙනා සාර්ථකව හඳුනාගත හැකි ලෙස විසඳිය හැකි ගැටළුවකි...)
===================================
Web Statistics